ابراهيم بنشواف mcg24
الصَّحراء المَغربيَّة هي جزء لا يتجزأ من المملكةالمغربية، وعندها تاريخ طويل كيرجع لقرون. هاد المنطقة كتمتاز بطيبوبة أهلها، وبرمالها الذهبية وبشمسها الفضية، وبالثقافة المتنوعة والغنية اللي كتميز ناسها.
من زمان، الصَّحراء المغربية كانَت ديما مرتبطة بالمغرب، وكاين وثائق ودلائل كتبيّن الارتباط التاريخي اللي كان بين أهل الصحراء والملوك ديال المغرب، بحالهوم بحال كافة جهات المملكة.
واليوم بزَّاف ديال الدول كتعترف بأن الصحراء هي جزء لا يتجزأ من التراب المغربي.
منذ سنوات، كان مشكل مفتعل من طرف الأعداء حول الصحراء المغربية، وبزّاف ديال الجهات كانت مدفوعة من أعداء الوحدة باش تخلق المشاكل للمغرب وتعرقل المسيرة التنموية ديالو. لكن المغرب داير جهود كبيرة باش يدافع على حقو التاريخي المشروع بطرق سلمية. وفي هاذ الإطار المغرب عرض مشروع الحكم الذاتي في إطار الجهوية الموسعة، وهو مقترح كيعطي للمواطنين حق إدارة شؤونهم المحلية تحت السيادة المغربية، وهاذشي كان مُساند من الأمم المتحدة اللي اعتابرتو حل معقول ودائم.
اليوم، بفضل سيدنا الصحراء المغربية كتعرف نمو اقتصادي مهم جدا، كاين فيها مشاريع كبيرة فمجالات بحال الطاقة المتجددة والسياحة، وحتَّى البنية التحتية تطورت بشكل كبير، والناس كيعيشو فيها بسلام وأمن وأمان، وكيمارسو تقاليدهم وعاداتهم بكل حرية. وهاذ الشي ضَرّْ بزاف الأعداء وخلاهم يكيدو بجميع الوسائل، ولكن هيهات هيهات.
الصَّحراء اليوم هي رمز للوحدة الوطنية عند المغاربة، وكل عام كايحتافلو بذكرى المسيرة الخضراء اللي كانت فـ6 نونبر 1975، وهي مناسبة كتذكّر كيفاش المغاربة اتحدو بشعار “الله، الوطن، الملك”، ومشاو للصحراء باش يثبتو للعالم أنها جزء من بلادهم. آبائنا وجدودنا ضحاو بكل غالي ونفيس من أجل الوطن.
اليوم الجيل الحالي، خاصو يتمعَّن مزيان في تاريخ بلادو باش يكون قوي في المستقبل ويقدر يحافظ على الوحدة الوطنية ويزيد بالبلاد للقدام.
