المغرب وموريتانيا: رؤية ملك لتعزيز التعاون والتكامل

ابراهيم بنشواف mcg24 

الزيارة اللي قام بها الرئيس الموريتاني للمغرب هي خطوة مهمة كتبيّن بوضوح العمق ديال العلاقة اللي كيربط البلدين. ملي وصل، استقبلو جلالة الملك محمد السادس فالقصر الملكي، وهنا كيبان المستوى العالي ديال الاحترام والتقدير اللي كيجمع الجيران، حيت واخا جلالة الملك مريض ومتبع العلاج ديالو، الله يشافيه، قام بواجب الترحيب بالضيف ديالو على عادة المغاربة، رغم ان الزيارة كانت في البداية خاصة.

هاد الزيارة ماشي غير بروتوكولية، ولكن عندها أبعاد استراتيجية. المغرب وموريتانيا عندهم علاقات قوية، ولكن كيبان باللي كاين رغبة باش هاد العلاقات توصل لمستوى أعلى، خصوصاً فتطوير مشاريع بحال خط أنبوب الغاز الأطلسي-الإفريقي اللي غادي يربط إفريقيا بالمحيط الأطلسي. هاد المشروع ممكن يكون مفتاح لتقوية الاقتصاد ديال الجهتين ويفتح فرص جديدة للتنمية، وكذلك مبادرة تسهيل ولوج دول الساحل إلى المحيط الأطلسي اللي واقف عليها جلالة الملك باش الخير يشمل كافة الدول اللي باغا تنمي اقتصادها وتعيش شعوبها في النعيم.

من جهة أخرى، هاد الزيارة جات في وقت حساس، حيث المنطقة كتعاني من تحديات كبيرة، سواء اقتصادية أو سياسية. التنسيق بين المغرب وموريتانيا ممكن يكون عندو دور كبير فتجاوز هاد التحديات، بحكم الموقع الاستراتيجي ديال البلدين.

العلاقة بين المغرب وموريتانيا ديما كانت فيها بزاف ديال الاحترام والتعاون، ولكن اليوم كيبان باللي كاين وعي بضرورة الانتقال لمرحلة جديدة، فيها شراكات اقتصادية قوية ومشاريع كبيرة اللي تخدم الجهتين.

جلالة الملك والرئيس ماشي غير كيتكلمو على علاقات ديال صداقة، ولكن على مستقبل فيه تعاون كيخدم مصلحة الشعبين. وهاد الشي اللي خاص يكون نموذج لباقي الدول: كيفاش الجيران يقدرو يخدمو مع بعض على مشاريع كبار تساهم فالتنمية والاستقرار.