استعمال التكنولوجيا لمحاربة احتلال الشوارع العامة في الهند

ابراهيم بنشواف mcg24 

البارح وانا كنتجول في اليوتوب، بان ليا واحد البلان واعر بزاف:

فالهند، كتحاول السلطات تواجه مشكلة احتلال الشوارع العامة بطرق جديدة وفعّالة باش تنظم الفضاء العام وتفرض احترام القوانين. من بين الحلول اللي خدامين بها، كاين استعمال أجهزة الأداء الإلكتروني اللي كتخليهم يفرضو الغرامات فالحين. وهي الوسيلة اللي كيتخلصو بها من خلال البطاقة البنكية بطريقة إلكترونية TPE.

هاد الطريقة كتسهّل الأمور، حيث المخالفين كيخلصو الغرامة فبلاصتها بلا بزاف ديال البيروقراطية ولا تعطيلات.

الفيديو تيبين الحملة فيها المسؤول والمرافقين ديالو، بحالنا في حملات من نفس النوع.

ولكن اللي أثار انتباهي هو المساعدين كلهم عندهم نفس اللباس وتيبان شكون اللي تدخل. نقطة أخرى هو ما كاينش شي واحد مسلح كيرافقهم، يعني بوليسي أو جدارمي. لأن هاذو عندهم مهام ربما تكون أهم في المجتمع وما خاصش يتشغلو بمهام عادية ويضيعو جهدهم ووقتهم في أمور بسيطة لأن المواطن عارف داير الغلط.

هاد الخطوة ديال الأداء في البلاصة بطريقة إلكترونية كتضمن الشفافية، بفضل التوثيق الفوري لكل عملية أداء. وكتزيد من الفعالية، حيث المخالف كيسوي وضعيته فدقيقة. وفنفس الوقت، كتكون وسيلة ردع قوية، حيث كل واحد كيعرف أن المخالفة ديالو غتكون عندها عواقب فورية وما كاينش منين يهرب. زائد كتنقص الخدمة على المحاكم وإدارات الضرائب.

هاد النظام زوين كيعالج بزاف ديال الحالات، بحال الفراشة اللي ما عندهمش ترخيص، الطوموبيلات اللي واقفة فبلايص ممنوعة، أو أي نشاط كيعطل حركة السير. استعمال التكنولوجيا فبحال هاد الحالات كيبين على واحد التوجه نحو تنظيم المدن وتحسين جودة الحياة، باش يبقى الفضاء العام ملك للجميع ومنظم كيفما خاصو يكون.