حب الوطن.. بين القول والفعل

ابراهيم بنشواف mcg24 

كيفاش تكون وطني؟ الوطنية ماشي شعارات ولا كلام كبير كيتقال قدام الناس، الوطنية هي أفعال كتدل على حبنا لبلادنا وحرصنا على المصلحة العامة. باش تكون وطني، خاصك تحب بلادك بصدق وتكون فخور بالتاريخ والثقافة ديالها، ما تخليش شي حد ينقص من قيمتها، وديما حاول تقدمها بصورة زوينة.

الوطنية كتعني تخدم بلادك ولو بحاجات بسيطة، بحال المساهمة فنظافة الحي والشارع والمدينة، تقديم المساعدة للناس، أو المشاركة فأنشطة عمومية كتخدم مصلحة المجتمع.

خاص نكونو إيجابيين ونحترمو القوانين، لأن هاد الشي كيعبر على وعينا ومسؤوليتنا. نتعلمو نطورو راسنا، حيت بالمعرفة نقدروا نبنيو مستقبل زوين لبلادنا. وندافعو على بلادنا بوعي وبالحجة القوية ومنساهموش في توزيع الإشاعات والأباطيل.

الوطنية كتعني نحافظو على الثقافة والموروث ديالنا ونكونو فخورين به، ونعلمو ولادنا نفس الشي.

لازم نكونو ديما متضامنين مع الناس ديال بلادنا في الحق، حيت الوطنية هي تعيش بروح المساعدة والتآزر والتضامن. الوطنية ماشي حاجة كتجي بالصدفة، ولكن هي أسلوب حياة كيبان فالأفعال اليومية.

كل واحد فينا يحب بلادنا، ويخدمها بصدق، وغادي نكونو وطنيين بالمعنى الحقيقي.