ابراهيم بنشواف mcg24
التعديلات الجديدة اللي تم تقديمها قدام جلالة الملك على مدونة الأسرة كتجي باش تصلح بعض المشاكل اللي بانت في التطبيق ديالها. مثلا، غادي يكون ضروري توثيق الخطبة وكتابة عقد الزواج، وما غاديش يبقى سهل سماع دعوى الزوجية إلا في حالات خاصة.
بالنسبة لزواج القاصرين، غادي يبقى السن القانوني هو 18 عام، لكن غادي يسمحوا بالزواج فـ 17 عام غير في حالات خاصة، وبشروط صارمة باش يحميو القاصر.
أما تعدد الزوجات، غادي يسولو الزوجة واش كترضى بهديك الفكرة أثناء كتابة العقد، وغادي يكون ضرورى مبرر قوي باش يسمح القاضي بالتعدد، بحال العقم أو مرض الزوجة اللي كيمنع المعاشرة الزوجية.
فالحضانة والنيابة القانونية، غادي تكون مشتركة بين الزوجين، سواء كانوا مزوجين أو مطلقين. وغادي يتخذ القاضي القرار إلا إذا وقع نزاع بيناتهم. وحتى الأم المطلقة غادي تبقى عندها الحضانة حتى إلا تزوجات، وغادي يضمنوا السكن للمحضون.
الإرث حتى هو تبدلات فيه بعض الأمور، وغادي يسمحوا بالوصية والهبة بين الزوجين حتى إلا كانوا من ديانات مختلفة. البنات غادي يقدروا يستفدوا من هبة الأموال قبل الوفاة باش يتم إنصافهم.
وباش يسرعوا الأمور، غادي يقلصوا المدة اللي كتحتاجها قضايا الطلاق والتطليق لـ 6 شهور كحد أقصى. وغادي يعتمدوا وسائل إلكترونية باش يوثقوا العقود ويوصلوا القرارات القضائية.
الهدف من هاد التعديلات هو يتماشاو مع الواقع ديال المغاربة ويواكبوا تطور المجتمع، ولكن مع احترام الشرع والعادات.
